宝宝小记N+7

         前日，亦即系21号，我宝宝刚刚满100日。我一早就系芭比娃娃个度帮宝宝预订左个儿童摄影套餐，约左个晚7点半去影（因为日头都约满晒）。我地一家三口去到个时已经8点几啦，迟到左，而且个个时候宝宝都训到好似猪咁，D姐姐叫我约过其他时间，但系佢地一直都28号都约满晒，所以其实我系想影嘅。

        呢个时候，宝宝有醒嘅趋势，于是我就哄佢，想佢兴奋D，开心D，点知宝宝点哄都系一副好无奈嘅样（不过偶然间都有D笑容），总嘅来讲都尙算精神。于是我就觉得影。呢个套餐一共可以拣3套衫仔。D姐姐帮宝宝换衫个时宝宝就开始扭计啦，无办法啦，佢钟意痴住我，唯有我亲自出马啦。但系影相嘅时候，宝宝真系笑都唔笑下，系咁周围望，有时仲扁晒嘴想喊。好不容易先影完，要一个星期之后先有得拣相。

       然后琴晚，唔知点解宝宝10点几醒左之后就好精神，一直唔肯训觉，极度兴奋状态。我要哄左佢训先可以去冲凉（佢爸爸搞唔掂佢），于是我又唱歌仔，又讲故仔咁哄佢训（故仔有D段落唔记得，自己作上去，非常想去买本童话故事书），一直折腾到12点几，搞到我口都干晒，宝宝终于肯训觉啦~~！！

        唔知佢今晚会晤会咁呢？