同爸爸嘅点滴（1）

          好细个嘅时候，爸爸就已经带我去儿童公园玩。后来爸爸话比我听，个时想同我玩个只小型过山车（好似系，依家已经无左好耐），点知工作人员话我太细个，规定唔可以玩。

          我记得以前妈妈上夜班，爸爸就带我去肇庆电影院睇电影，我记得我地每次去到，爸爸多数都系带我睇武侠片，有时睇到我恰眼训，跟住睇完之后，一定会系隔离条巷仔间面档个度食面，我觉得个度嘅面真系唔系一般好食啊。

         3岁嘅时候，爸爸就带我去星湖塘游水，我记得我用水泡嘅机会甚少，所以好快就学识游水。爸爸好钟意浮身，佢甚至可以浮系水面上面睇书，唉，呢一样，我点学都系唔识。

         后来，爸爸受我嘅影响，钟意左唱歌，于是我地屋企买左VCD机同麦，爸爸就晚晚都系我间房个度唱得不亦乐乎。然后我同爸爸几乎每个星期都要去唱K，当然唔系包房唱啦，边有咁多钱，我地系坐大厅唱。最搞笑嘅就系，因为大厅系轮流唱嘅，我同爸爸就谂到一个方法唔使等咁耐------一人坐一张台。有时妈妈都会同我地一齐去，不过佢多数都系训着觉。因为爸爸钟意唱旧歌，所以久而久之，我就识得好多同我年纪无相乎嘅歌。

         爸爸都有打过我架，仲系比较狠个种，一开始我会喊，但系后来我觉得我喊佢都会打架啦，所以干脆唔喊。而且发展到佢每次打完我，我仲好似无事咁哄翻爸爸倾计。记得有一次佢仲向我投诉话打我个时扭亲左只手...我无语。

         就写到呢度先啦，唔知爸爸仲记唔记得呢D事呢，下次再写多D啦。