过年呢几日

       又有一段时间无写日志啦。讲下呢一排先。首先，就系1月27号个日，同我表妹去睇左《喜羊羊与灰太狼之兔年顶呱呱》，其实我对呢部电影真系几期待，据闻又好多亮点，笑点。不过可能期望太高啦，我觉得呢部喜羊羊3唔够上两部精彩，不过都系值得去戏院个度慢慢欣赏嘅，笑点泪点都有。

       到31号个晚，我同妈妈，钰羲，宝贝猪去左日本桥食野，食之前团购个个3人套餐。我个人认为，真系唔系好好味，除左几片鱼生之外。而且份量真系好少，唉，88蚊3人套餐系咁上下架啦，将就下啦！

       然后2月1号，同妈妈去左四小个边摆摊，百花园个边就继续系六姨睇住。我发现四小个边D人讲价真系超犀利，虽然卖左几多野，但系好似赚得唔系好多，唉，不过清得就清啦，如果唔系又要到下年先可以卖架拉！

       年30晚，系四舅母个度食完饭我地就翻左屋企，由于我真系唔中意睇春晚，所以就谂住出去行下（散下步，个晚真系食得好饱），不知不觉行到体育中心花市，呢个时候，花市基本上已经人去留空，仲要留低一大堆垃圾。不过仍然有卖花嘅商贩尽最后嘅努力，1蚊一支桃花，5蚊一扎10支，真系卖得好平。可惜我对花真系无乜兴趣，行左一轮就系买左少少凉果翻去比妈妈食（我唔中意食凉果架..)

      到左年初一，由于某猪挂住打机，所以我同妈妈同钰羲出左去玩，等某猪自己系屋企画圈圈啦。年初二就去左婆婆个度拜年，跟住晚上同婆婆，二大舅父去左珍宝食饭。

       年初三，系赤口，不宜拜年。于是下午就威逼利诱某猪陪我去睇左《最强喜事》。印象最深，最难忘嘅就系杜汶泽浓妆扮女人唱《忐忑》。真系唱得太似啦，无论系眼神定系表情，简直系全场爆笑，笑到肚痛啊。

       今日年初四，暂时嘅节目系，晚上去珍宝食街食饭...

        然后，我依家好想睇《开心万岁》啊，据闻比《最强喜事》搞笑喔！~~