方中信大爆17岁女儿拍拖，大感不舍：佢唔好唔记得老豆！

方中信今日（13/9）現身金鐘出席投資分享會，提到17歲女兒符迦晴的感情狀況，方中信接受《香港01》訪問時大方分享：「佢談情呢家嘢佢係有啲進度嘅，（你批准？）其實有得唔准咩，佢偷偷地咪仲衰，不過佢就當然講啲唔講啲啦。（有冇講個男仔點識？）其實佢就冇講，但我就冇問咁多，始終問佢佢都可以講大話啫，亦都可以隱瞞我哋，咁所以都唔會去問咁多。」

方中信17歲女兒符迦晴。

被問到有否見過男方時，方中信表示：「其實都有望過兩眼嘅，係見過佢真人嘅，對方都靚仔嘅。（有冇你咁靚仔先？）其實同我都不相伯仲，佢ok嘅，都係乖嘅，年紀就應該唔係差太遠。」被問到會唔會叫阿女唔好掛住拍拖，唔好忘記其他事？方中信笑言：「佢唔好忘記老豆囉，同埋唔好忘記讀書，同埋我諗在座咁多位17歲都拍拖啦，拍拖唔係問題，但就唔好忽略學業，始終讀書係基本責任囉。」

方中信透露女兒拍拖談戀愛。（陳順禎攝）

方中信今日出席投資分享會。（陳順禎攝）