跑长途的感觉

在此,我奉劝各位要学车的朋友,系交学费嘅时候一定要问清楚,学费包唔包长途费,同包嘅范围去到边度,一定要问清楚!
因为我个人就因为跑一个长途就无咗唔少钱,用咗钱唔紧要,最紧要系全程俾人闹,无停过咁闹!啱开车之前无同我讲过任何一个细节,但一开车有少少错就拿埋我亚妈出黎,算咩意思啊?我亚妈得罪咗佢啊?
当跑长途嘅前一日我问个老细,问清楚,当初虽然无讲话学费包长途费,但我问要交嘅400蚊系咪包晒噶啦?包埋所有食饭?当初嗰个老细答我话包埋噶嘛,好啦,到咗跑长途嗰日,8点45分出发,去到佛冈,嗰个教练就话大家都饿啦,食咗饭先再行过啦,我哋无意见,嗰餐饭系我呢生中食过最难食嘅一餐饭,一碟鸡(未熟嘅收78蚊),一碟鱼(带血嘅收58蚊),仲有猪肠(其呕心程度我就唔讲啦但都收58蚊),一碟盐水菜心(心唸呢碟都正常啦挂,但原来唔系噶,D菜心老到应该拿去人度毁灭噶啦,竟然收38蚊),仲有个汤,呢个汤极品啊..唔好意思,我好似讲错咗,应该唔系汤,正确黎讲应该系屎水,我饮咗一淡,差D呕返出黎..但都要收58蚊,再加上教练拿咗包烟,一共300元,呢餐饭辛苦啊!
食完饭啦,教练话都唔早啦,埋单走啦,跟住有个人拿钱出黎埋单(同我一样都系跑长途嘅学员),埋咗单啦,个教练就话呢餐嗰个人俾住先,等返黎嗰时再分返钱,我当时就埝啦,当初唔系讲好400蚊包晒咩?莫非...
结果好明显,我估啱咗,仲有就系路费,去连南再返黎路费加埋未到50蚊,但啱开始嗰个教练就同我哋讲不如你哋边个俾住100蚊我俾路费先啦,到返黎再分担返,好啦,真系有个人咁白痴俾咗佢,我啱想讲不如沿途我哋俾算啦,一人俾一次都好啊,但我未讲出声啊,嗰个白痴仔已经拿咗100蚊俾嗰个教练,好啦,到最后啦,应该仲有50几蚊嘅,但无一分钱俾返到嗰条白痴仔手上,我就埝啦,你个白痴仔钱多俾我啊,好过益咗D无赖...
去到连南我先知道,原来人哋所讲嘅包食包住只需要175蚊一个人,虽然食嗰方面难食咗D,但胜在够平,但我当初交咗400蚊喔,再加上沿途食饭钱同路费呢?
到第二日返黎啦,我哋去到英德,又到食饭时间,呢次好少少,4个菜,依然有鸡,有鱼,仲有个青菜同一碟瓜,但都要用咗275蚊,呢下好玩啦,俩餐饭差唔多用咗600蚊,仲要难食到离谱.
到而家,我都未去揾嗰个老细投诉,因为我知道我而家去投诉无用,等我拿到个车牌我就打电话去车管所同工商局投诉,无论成功与否,我都要投诉,因为呢淡气我吞唔落!