一个会爆seed嘅设计师
上星期我经历咗一次比较大嘅挫折,虽然我都知道係好平常,因为毕竟冇一条路係全程都可以飞到尽油都唔使收一下...
但係我觉得最攞命嘅并唔係个客唔buy我出嗰个版,而係最近几个星期我都唔知自己做紧乜,为咗做嘢而做嘢,为咗上班而上班...冇火,更加唔好讲爆seed...
我好努力咁想知道到底自己做紧乜...我觉得我需要重新思考下一啲好重要嘅问题...
做一个自己嘅代表作係为咗乜?做一个出色嘅设计师係为咗乜?
今个周末我见咗好多人,其中包括一大班旧同学,冇见咁耐大家都冇乜点变,中意讲嘢嘅依然咁中意讲嘢,中意搞嘢嘅依然咁得人惊,佢地个个都好努力咁工作紧...大家都涯得好辛苦(公安除外)...讲下讲下...唱下唱下...玩下玩下...我又完全沉醉喺佢地入面,好似翻番去未毕业嗰阵咁...
直到喺地铁同阿章阿炳分开嗰一刻,我先意识到,係喔,我已经唔可以好似以前咁日日见到佢地...
翻到三水,不舍嘅感觉依然冇减退,之后出现嘅又係文文,唔知点解次次都会係佢,上次毕业同大家分开之后,又係佢陪住我,今日番来之后又係佢陪我冇牌驾驶周围兜...唔係我刻意安排,都係巧合,咁先得人中意...
我地去咗好多地方,包括一啲我以前读书经常去嘅地方...以前住嘅地方...仲有就係一啲新开发嘅地方...
同佢一齐令我觉得我喺三水并唔係得自己一个,但係当分针同时针成一直线,文文就要番屋企啦,下星期嘅今日佢就要番学校...好草率咁道别咗之后我地就行上咗各自嘅路...
喺嗰一刻,嗰种不舍嘅感觉简直就达到咗胸前嘅新高,我喺公路上面不停咁加油,最抵死嘅就係沿路竟然冇红灯...我试图用速度来令自己进入瞬间嘅麻木...但係依稀中我都依然意识到自己係冇牌驾驶...于是我先轻轻咁收一收油...灵光一闪...刚才提到嘅嗰啲问题...好似有咗答案...
我同02IA讲,我要做一个出色嘅设计师,因为02IA唔衰得!
我同阿森屎华倩茹小燕讲,我要做一个出色嘅设计师,因为佛山人唔衰得!
我同阿水文文菜姑讲,我要做一个出色嘅设计师,因为三水人唔衰得!
冇错!就係因为唔衰得!我以后上班唔再望落班,我唔再憎星期一,唔再望放长假...
我要用最少嘅时间,将flash同photoshop嘅力量发挥到最大!
我要好似kira咁,无时无刻都可以爆到seed~~
听日我又会番到另外一个集体...讲真,我觉得自己真係几幸福,喺同一大班好朋友分开之后,喺办公室真係得到好多温暖(应该唔係虚火呱~~)...人喺唔同嘅阶段都会遇到唔同嘅人...冇人可以陪自己一世(或者有一个人可以,但係我都未知道佢係边个)...珍惜身边嘅每一个人,一齐走过人生嘅每一个阶段...喺收皮嗰一刻,除咗自己嘅亲人之外,仲有一班喺地球识嘅同类为自己嘅收皮而感到惋惜甚至悲痛,我嘅收皮就会有价值...
决定咗啦!我要做一个有少少特别嘅普通人,客观咁存在喺亲情...友情...同爱情之间...
页面更新:2024-05-13
标签:日志 网友日志 中意 设计师 出色 地方 都会 大班 星期 阶段 努力 感觉 今日 分针 虚火 好朋友 少少
1
2
3
4
5
上滑加载更多 ↓
所有内容加载完毕