半岁啦，半岁啦

         好似有几日无写日志啦。今日系钰羲半岁，所以就系咁咦写D野啦！

         半年前，3月14号，白色情人节嘅早上，我可爱嘅钰羲终于来到呢个世界啦。个一日，我真系永世难忘。转眼间，依家钰羲就半岁啦，已经开始牙牙学语，已经开始要妈妈抱抱（呃，貌似其实好耐之前都识得要妈妈抱抱...）。睇住佢一日一日咁成长，一日一日咁变化，个心真系觉得万分安慰。

        上星期日，第一次同钰羲去参加率性妈群嘅亲子活动，个日9点钟，宝贝猪就开摩托车搭住我同钰羲去星湖名郡（实不相瞒，我地确实唔识路....，兜左好耐先到）。去到个时已经过佐9点半啦，活动刚刚准备开始，但系由于太多人啦，我地无位坐，后来要现场加凳先有位。

        个日有好多亲子互动嘅游戏，但系因为钰羲太细啦，后面D例如二人三足，抢凳仔，食香蕉呢D游戏都唔岩佢玩。只有开始个个BB爬爬游戏，佢可以勉强咁样参加....呃，其实佢都唔系好识爬，我个日放左佢落个爬爬垫个度佢就系咁趴住，望住我，然后无郁过....呃.....不过后来东方爱婴D姐姐见佢咁细个（应该系全场最细），就比左个安慰奖佢。

         中午个时活动结束，我地谂住开车翻铺头，点知开开下部车死火。唉，个时仲要落雨。好彩钰羲戴住帽帽，仲有我护住佢，但系我真系好攰啊，宝贝猪就推车，我就系旁边抱住钰羲行（钰羲训左）。宝贝猪期间N次叫我自己打的翻铺头先，但系我觉得无理由要佢一个自己系呢度推车架，于是我就陪佢，加上个时雨唔大，钰羲又唔会淋亲。

         好彩推推下部车又开到啦，于是我立马上车，点知刚开到伴溪又死火，又要推车（个时已经停雨），唉，玩野咩。今次又系推左一段路又开到，于是我又系迅雷不及掩耳咁上左车，非常幸运，今次终于可以一次过开翻铺头。

          然后讲下今日，今早带左钰羲去打预防针同体检，哇，真不是一般的多人（好多都系接种麻疹疫苗嘅）。于是先同钰羲做体检，重6.9公斤，高67CM（医生写66，我睇到系67架，加上我钰羲无头发），正常。刚体检完，就到钰羲打针针。我发现每次钰羲打针针个时都好勇敢架，只系喊两声，跟住就好似咩事都无发生过咁。今次都唔例外，真系好乖啊！

          钰羲，最爱你啦！