头先11点几先放工,喺花园酒店站,等夜14嘅时间几乎俾搭车时间仲要耐~~
上到车已经快12点...翻到嚟12点半啦!
空港快线
就算夜晚十一二点,都会见到呢啲车停喺花园酒店,国航啊,南航啊...
明显喺机场开过嚟嘅,唔少外国人,今晚就见到个包装袋印住Dubai...
睇住人哋大袋细袋嘅行李,可怜我呢个未搭过airplane嘅孩子T_T
的士
因为公交车已经转入夜班时间,肯定又人等唔到夜车或者无车翻屋企,的士佬肯定想揾钱啦!
好多喺"空港快线"落车嘅人,只眼好似就得绿色嘅车,个个好似唔使钱咁上咗的士...
见到个鬼佬唔识讲中文,攞个广州地图出嚟同个的士佬指指画画,真系有冲动上去做翻译,收翻人民币价钱都好~
唉~~既然有钱搭得飞机,都唔挣在打的啲钱啦~况且有啲人交通费系食皇粮咖嘛,交上去报销就得啦~~
最记得<天幕下的恋人>,郑嘉颖(我唔多中意佢,觉得佢做戏好生硬)一句,
要想做有钱人,先要靠到啲有钱人......
每日都好多富婆过嚟买嘢,特别系买Maybelline嘅,几时有富婆得嚟又靓女,又后生嘅包起我?!
公交车
空港快车开走咗,绿的开走咗,我要等嘅夜14终于嚟啦,好多空位...
月票无咗,上个月1蚊唔使嘅路线,呢次要俾足3蚊,广州政府真狠心...
坐住夜车,喺环市东路行,发觉同环市东有仇定有缘?!
广工隔离嗰个细都唔可以再细个大专本部...
友谊12楼,为咗KFC见习助理,上去3次,3次都系衰收尾,宜家见到K仔终于24小时营业,心都寒埋,做死人咩?
东都大世界,康师傅,5月份嗰阵,明明拒绝做,仲死嗌我等应届毕业生去做业务...
世贸,Watsons,偏偏就系友谊隔离栋楼上班,或者系天意,广州真系细...
喺广州压力真系好大,先唔讲乜买屋买车之类,
无形嘅压力有时已经好难顶,每日嘅公交压力,难得有钱去充值羊城通,仲要睇自己好唔好彩上到一部比较空嘅公交...
上班上司下属之间压力,同事之间嘅竞争...人多一样要揾钱食饭,你唔去揾,大把人争住揾,到时盏饿死自己...
无办法,鬼叫我无名牌大学砂纸,鬼叫我做唔到沙坪嘅政府工...
辛苦仲要捱落去,宜家仲想喺广州工作,虽然有时好想去下其他城市...
有时可以见下小方,我就满足晒啦~~
估唔到2010年第一篇日志,就咁怨念...
页面更新:2024-05-03